WSAVA, KSAVA dhe OVK-ja organizuan seminarin e radhës me temë “Urgjencat te kafshët shoqëruese”.
Në këtë aktivitet mori pjesë edhe Dr. Kris Gommeren, ekspert ndërkombëtar nga Universiteti i Gentit në Belgjikë, i cili ndau njohuritë e tij mbi trajtimin e situatave emergjente te kafshët.
Kryetari i OVK-së, Hasan Limani, vlerësoi organizimin e seminarit dhe theksoi rolin kyç të edukimit të vazhdueshëm në përmirësimin e shërbimeve veterinare në Kosovë.
“Këto seminare janë thelbësore për avancimin profesional të veterinerëve tanë dhe përmirësimin e shërbimeve ndaj kafshëve. Bashkëpunimi me ekspertë ndërkombëtarë si Dr. Kris Gommeren sjell njohuri të reja dhe përvojë të vlefshme për profesionistët tanë”, tha ai.
Ndërsa presidenti i KSAVA-s, Dardan Pozhegu, njëherësh anëtar i kryesisë në OVK, theksoi se ky vit shënon një jubile të rëndësishëm, pasi kjo është konferenca e 10-të e KSAVA-s. Ai falënderoi të pranishmit për interesimin dhe vlerësoi mbështetjen e WSAVA-s duke nënvizuar rëndësinë e ndërhyrjeve të shpejta në rastet emergjente tek kafshët shoqëruese.
Seminari u përmbyll me ndarjen e certifikatave për pjesëmarrësit, të cilat u poentuan me 6 pikë duke u konsideruar një vlerësim i rëndësishëm për zhvillimin profesional të veterinerëve.
Të pranishmit u shprehën të kënaqur me përmbajtjen dhe organizimin e seminarit duke e cilësuar atë si një mundësi të shkëlqyer për shkëmbim eksperiencash dhe përmirësim të praktikave veterinare në Kosovë.
